Kúmmin & kanill

Í morgun færði sá myndarlegi mér kaffi í rúmið og vippaði svo amerískum pönnukökum framan úr slopperminni

Í kvöld kryddaði ég lambaframhryggjarsneiðar með salti, pipar, kummin, kanil og chili, velti upp úr hveiti og steikti á pönnu stutta stund

Dillaði mér og söng með Billy félaga mínum meðan sá myndarlegi rýndi í skólabækur

Steikti gulrót og smátt skorinn lauk á sömu pönnu og kjötið, bætti 2 pressuðum hvítlauksgeirum við og örlítið seinna 2 dl af vatni og 2 dósum af tómötum. Allt sett í eldfast mót og látið dóla í klstund í ofni á 160°, álpappír breiddur yfir mótið. 1 dós af snjóbaunum bætt við og látið malla, án álpappírs, í 10 mín. í ofni til viðbótar

Í salat átti ég iceberg, papriku, tómata, blaðlauk, ólífur, hvítlauksost og sesamfræ

Á diskana átti ég prúðbúna madame Angelique

Rétturinn þarf ekki á meiru en salati að halda, mikil fylling í snjóbaununum og við söknuðum hvorki kartafla né hrísgrjóna

Best er svo að sjálfsögðu að njóta góðs matar í enn betri félagsskap

Dino hélt okkur svo selskap við uppvaskið og sló taktinn í vangadansinum þar á eftir. Lífið, ó lífið.

Pjattaður plokkari

Í gærkvöld fórum við á indverskt matreiðslunámskeið. Elduðum litríkan mat með dásamlegum kryddum. 

Í kvöld settum við plokkfisk á rúgbrauð, breiddum heimagerðri bernaisesósu yfir og stungum inn í ofn

Fórum því næst á námskeið í Evrópumálum með magana fulla af spariklæddum plokkfisk. 

Annað kvöld ætlum við bara að læra þetta venjulega. Hvað skyldum við elda með því?

Var full í Hörpu í gær

Full af gleði yfir öllu skemmtilega fólkinu sem ég hitti. Full af fjöri yfir allri frábæru tónlistinni. Full af orku í dunandi dansinn. Full af rauðvíni.

Full seint að fá sér fyrsta kaffibolla dagsins núna en svona getur maður látið þegar hausinn er fullur af ryki. Full af söknuði eftir myndarlegum manni. Full af hugsunum um konuna sem elskaði einveru en getur nú ekki hugsað sér sólarhring án þess myndarlega. Fullt af skrýtnu sem smellpassar.

Dró fram þennan ókunnuga bolla og fyllti af kaffi. Var í skapi til að drekka úr bolla með gylltri rönd og rússnesku á botninum. Þarf ekki að vita neitt um hann. Kaffið er gott og bráðum kemur sá myndarlegi

Rísottóást

Miðað við þau ógrynni af rísottógrjónum sem ég hef þegar innbyrt fannst mér kominn tími til að hræra í aborrogrjónum sjálf. Sannreyndi þá visku að rísottógerð sé í raun einföld en krefjist þolinmæði. Hélt í heiðri ítölsku reglu Margrétar systur minnar og drakk glas af víni með matseldinni. Góð regla það.

Byrjaði á að velta 20 kirsuberjatómötum upp úr olíu og pipraði. Bakaði síðan í ofni í næstum því hálftíma, eða þar til þeir voru orðnir mjúkir

Skar lauk smátt og mýkti í 3 msk af smjöri og 1 msk af ólífuolíu. Þegar laukurinn var orðinn fallega glær setti ég 400 gr af rísottógrjónum í pottin og hrærði vel saman í ca 2 mín. Hellti því næst 125 ml af þurru hvítvíni í pottinn, lét sjóða og og hrærði stöðugt í meðan vínið sauð niður

Bætti 400 gr af niðurskornum tómötum úr dós í pottinn og lét malla í ca mínútu. Þá er komið að þolinmæðispartinum; 1,5 ltr (já, 1,5 ltr) af kjúklingasoði er blandað saman við og honum er ekkert hellt neitt útí sko, heldur er einni ausu af soði hellt útí pottinn í einu og hrært svo gott sem stöðugt í á meðan það sýður niður alveg þar til soðið er búið, ein ausa í einu

Ég notaði lágan hita allan tímann til að ofsteikja ekki laukinn og brenna ekki grjónin við í botninum í allri þessari suðu. Það er nefninlega alveg satt að það er ekkert erfitt að búa til ljúffengt rísottó en það krefst sannarlega þolinmæði. Ég smakkaði grjónin af og til meðan á matseld stóð og fannst gaman að finna hvað þau voru lengi að verða mjúk, en þau mega þó ekki verða lin. Eins á rísottóið ekki að vera of þykkt og því sauð ég ekki niður síðustu ausuna

 Í restina er 1 msk af smjöri hrært saman við, piprað að vild og uppáhaldshráefnunum mínum hent yfir; söxuð fersk basilíka og rifinn parmesanostur

Borið fram með tómötunum sem ég bakaði þarna einhverntímann í byrjun og leyfði að malla í ofni meðan ég byrjaði á rísottódásemdinni

Í mínum heimi er fátt sem jafnast á við rauðan lit, himneska lykt af saxaðri basilíku og dásemdarbragð parmesansostsins, nema þá helst ánægjubros míns myndarlega

 Bon appétit !

Aborriogrjón eru rísottógrjón. Uppskriftina klippti ég út úr e-u blaði fyrir nokkrum árum síðan en man því miður ekki hvaðan eða hvenær. 

Fyrirsögn óskast

Komst að því um daginn þegar rigndi hvað mest að trampskórnir mínir eru ekki vatnsheldir. Fór því í gær og keypti mér nýja skó. Mátaði voða þægileg plein svört stígvél sem hefðu líklega gengið við allt og allt og flest og helst, en hver fær staðist bomsur í eskimóastíl í lit og með rauðum reimum? Ekki konan hún ég

Viti menn, nú þegar konan er bomsuð til að arka blauta rigningu og brakandi snjó er eins og við manninn mælt að hvorki fellur korn af snjó né dropi af rigningu. Ég fór samt í nýju skónnum í vinnuna í morgun. Kom svona líka kampakát heim með funheitar tær og hlýar iljar 

Hversdagurinn

Í gær hitaði ég upp blómkáls og kartöflusúpuna góðu

braut saman fjalli af þvotti

og grúfði mig því næst niður í grautfúlt bókhald

Í kvöld nostraði ég við ástina

ástina sem gerir allt þetta hitt svo miklu bærilegra og allt annað þess virði.

Fimm

Lágum í heita pottinum og mændum á stjörnur á þeldökkum himni. Sötruðum kampavín með stjörnur í augum. Stjörnur í augum á deginum okkar. Laugardegi eins og þá