skat

Kona alla daga

2012-02-19T21:40:00.003Z

Þessi myndarlegi maður

gerir alla daga einstaka.

Fölsk augnhár

2012-02-18T17:19:00.005Z

Fór í Háskólann í dag og dró ljóð upp úr poka:

Haust

Gaman er að gánga

í úðanum og rýna

niðurí göturæsið

Í leit að perlum

eða krónkalli

eða bara vindlíngsstúf

Í úðanum, laugaður

tárum guðs

Á vit ástar

sem vafasamar heimildir

telja sterkari en dauðann

Fárast ekki yfir

grátnum í honum guði

Dást að því, hve haglega

götusóparar hafa

sópað föllnum laufum

saman í hrúgur

Dagur Sigurðarson (Hlutabréf í sólarlaginu, 1958)

Erum boðuð í boð með mat og þema. Þarf að fara að mála mig.

Kobbi flugmaður

2012-02-17T23:20:00.002Z

er skemmtileg blanda af kjúkling, rjóma, sweet chilli, bönunum, beikoni og salthnetum

Sjarmerandi bragðlaukasukk á föstudagskveldi.

Feb-eb

2012-02-16T07:16:00.003Z

Mikið sem það var indælt að keyra heim úr vinnunni í gær í birtu. Febrúarbirta já en birta samt. Meira undrið sem birta gerir fyrir sálartetrið. Líka fyrir tetur sem er glatt og sál sem er hamingjusöm. Rigning gærdagsins var þétt en létt. Minnti mig á vor. Sofnaði við gnauðið í vindinum sem hamaðist. Vaknaði snemma og vindurinn enn í ham. Snjóföl fyrir utan. Minnti mig á að enn er vetur.

Kaldur veturinn vekur upp hjá mér hlýju og snjór með því fallegra sem ég veit. Litasynfónía hausts og vors augnakonfekt og upphaf í báða enda. Þó jafnast ekkert á við sumar. Heitar tilfinningar, gleði, fyrirheit. Merkilegt þetta samspil árstíða, veðurs og manns.

Bráðum kemur rjómi og síðan súpa.

Valentínus

2012-02-14T23:01:00.003Z

er hrekkjalómur.

Ef ég væri með hatt tæki ég hann ofan fyrir samstarfsfélaga mínum fyrir að halda kurteisinni og kúlinu þó hláturinn kraumaði í honum.

Talandi um app

2012-02-09T22:13:00.000Z

þá hitti ég hann á bensínstöðinni í gær

Appaðu þig í gang - ætli hann starti Skódanum með appinu?

Ég var einmitt búin að velta því fyrir mér hvað þetta app væri eiginlega. Að sjálfsögðu er app vel snyrtur ~~fermingardrengur~~ hvítur karlmaður í jakkafötum. Ekki yrði ég hissa þó upplitaði skódinn væri farartæki svo strokinnar ímyndar. Það er víst ekki allt gull sem glóir.

Velti því fyrir mér -

2012-02-08T06:48:00.004Z

Eftir að hafa fylgst með fésbókarvinum raða inn "fyrstu statusunum" sínum lét ég undan áhrifagirninni og tók þátt. Fór inn á app-ið svokallað og upphófst hið venjulega með því að taka þátt leyfir þú xxx að pósta á veggnum þínum, sækja upplýsingar á veggnum þínum, blablabla. Þessi partur hefur greinilega ekki breyst mikið í þessi 2 ár sem ég hef sniðgengið allt svona "leikjadæmi" á fésbók. Nema hvað, ég gat hafnað þessum óskum, áður fyrr var það ekki alltaf hægt, og samt fengið niðurstöðu. Barbabrella. Niðurstaðan var röng. Velti því fyrir mér hvort það taki á taugarnar að vera sjálfumglaður er ekki fyrsti statusinn sem ég birti á veggnum mínum. Ég man vel hvenær ég skrifaði þennan status og um hvað ég var að hugsa. Kannski var app-ið bara fúlt yfir því að fá ekki aðganginn sem hann/hún/það bað um. Kannski fær app-ið þennan aðgang hvorteðer og bara heimskinginn ég veit ekki af því. Líklega treystir app-ið á að fólk muni hreinlega ekki hvaða status var sá fyrsti. Ég til að mynda hef ekki hugmynd, veit bara að það var ekki þessi því hann er mér minnisstæður.

Mannst þú hver er þinn fyrsti fésbókarstatus?

Túlípanar

2012-02-05T23:07:00.002Z

Á 51 árs afmælisdegi afa Lárusar gengu foreldrar mínir í hjónaband

Hallveig systir var 9 mánaða og 2 mánuðum síðar fæddist Bogga.

3 börnum til viðbótar, 8 barnabörnum, 5 barnabarnabörnum og 45 árum síðar

heldur hjónabandið enn.

1/2 ´12

2012-02-01T23:13:00.006Z

Meiri stælarnir að gefa upp magn af smjöri í dl í kökuuppskrift í blaði. Smámunasemi í frúnni? Já, líklega. Glöð samt því afraksturinn er hin álitlegasta súkkulaðikaka. Glöð líka því mánuðurinn minn er loksins kominn og krúttlegi kallinn minn löngu byrjaður að velta því fyrir sér hvað hann eigi að gefa mér í afmælisgjöf.

Afmæli.

Elska að eiga afmæli. Næstum jafn mikið og ég elska að eiga mann sem lætur mér líða eins og allir dagar séu afmælisdagar. Er nokkur furða að frúin baki köku úr súkkulaði og smjéri á þriðjudagskveldi og bæti nokkrum berjum í?

Hvað skyldi ég annars fá í afmælisgjöf?

Janúarjarm

2012-01-31T21:23:00.006Z

Er ekki sérlega gefin fyrir að elda kjöt í óratíma. Nema þá helst súpukjöt

Með kartöflum, baunum, túrmerik, sterkri papriku og Tyrklands myntu

Tókst að brenna nokkrar baunir í botninum. Þó er ég gefin fyrir baunir.

Nema kannski eina tegund af baun. Sem skiptir ekki máli.

Sú erta ertir ekki hér.

Illy

2012-01-26T18:31:00.004Z

Gott að fá il úr góðum bolla þegar maður gaufast einn undir teppi, kalt inn að beini, og kallinn paufast í ræktinni.

Við fyrsta .......

2012-01-24T18:13:00.005Z

Gafst upp á grábölvuðu hanagalinu og hringdi í þjónustuver Reykjavíkurborgar. Var gefið samband við deildarstjóra umhverfiseftirlits. Deildarstjóranum þykir afar ólíklegt að skipulag Samtúns gefi rými fyrir búfjárhald. Tjáði mér einnig að ferlið sem nú færi í gang gæti tekið tíma. Líklega nokkrar vikur. Hugsanlega e-a mánuði.

Hef oft dundað mér við að telja hanagólsloturnar sem færst hafa í aukana undanfarið. Get nú byrjað að telja dagana þar til ferlinu lýkur.

Hafa lesendur góðir e-r skemmtilegar tillögur um hvernig best sé að verja tíma sínum milli 05:00 - 07:20 eftir að hafa vera glaðvakin af hana?

Á bóndadaginn

2012-01-22T12:05:00.007Z

fékk maðurinn minn bláa rós í angalanga

eldaði kvöldmatinn sjálfur

og drakk bjór í boði bandaríska sendiherrans á Íslandi

Maðurinn minn er heldur enginn bóndi þrátt fyrir að vera vakinn af hanagali á hverjum morgni.

Golden Girls

2012-01-18T07:40:00.001Z

Talandi um iðnaðarsalt

2012-01-15T18:07:00.004Z

þá er ég búin að

drekka kaffi í rúminu yfir bókalestri
taka niður jólaskrautið
setja í þvottavél í fyrsta skipti síðan í fyrra
kaupa diska í nýja matarstellið
fá gefins ferkantað jarðarberjajelló
sofna yfir sjónvarpinu
baka bananabrauð með berjum
tala töluvert um brjóst og sílikon við þann myndarlega
fá mér miðdegisverð á Gráa Kettinum
máta fallega kjóla á helmingsafslætti sem reyndust allir of stórir
gramsa í Kolaportsdóti og kaupa fleiri bækur
skrá mig í þrjá kúrsa
elda mat án þess að leiða hugann að iðnaðarsalti

Berlín í bollu

2012-01-11T23:03:00.004Z

Fékk mér kaffi og Berlínarbollu

Hugsaði um ömmu.

Sá myndarlegi fékk sér Viskí og berlínarbollu

Gúffaði í sig bolluhugsanir.

Snjóþak

2012-01-10T21:32:00.006Z

Það er ekki bara ný-gömul ljósakróna sem hangir í húsinu okkar hérna í Túninu

Sem betur fer hékk þessi angalangi úti en ekki inni

Þeim myndarlega leist ekkert á að hafa þetta slytti slútandi yfir útirdyrahurðinni og mundaði skófluna fastlega

og feykti snjóhengjunni burt sem væri hún snjófis

enda snöfurmannlegur með spaðann

Angalangur

2012-01-09T19:05:00.005Z

Rétt búin að sleppa þeim skrifuðum orðum að ég kærði mig ekki um blóm þegar ég rak augun í þessi

Sá þennan dásamlega vönd fyrir mér í nýju borðstofunni okkar eða endurbættri stofunni, en þegar sá myndarlegi stakk upp á að taka svarta skrímslið* í borðstofunni niður og festa fína vöndinn upp ekki seinna en strax, tók ég ósjálfráða dásasteypu og jóðlaði jahá af einlægum innileika.

Enda veit ég ekkert hvenær nýja borðstofan verður nýja borðstofan eða hvenær við endurbætum stofuna, nenntum ekki einu sinni að setja í þvottavél þó karfan sé full. Nenntum bara að bæta á okkur blómum.

*Skelfilegasta ljósakróna sem ég hef augum litið.

Bókabéus

2012-01-08T22:01:00.005Z

Fór í muna-safnið í dag og keypti bókina sem mig vantaði

og já, örfáar aðrar sem ég átti ekki heldur. Nema reyndar þessa efstu þarna, en mig vantaði hana líka, hún er sko allt öðruvísi en þessi sem ég átti fyrir. ALLT öðruvísi.

Sumir vilja víst meina að maður geti jú endalaust á sig blómum bætt.

Ég kæri mig ekkert um blóm. Bara bækur.

Kisa fjögur

2012-01-07T22:53:00.005Z

Fór í góðan göngutúr í dag með þeim myndarlega í hálku og bleytu. Ætluðum á listasafn en stungum okkur þess í stað inn í Kolaportið, sem í sjálfu sér mætti kalla safn. Muna-safn. Sá bók eftir einn af uppáhaldshöfundum mínum. Taldi mig eiga gripinn og skildi hana því eftir. Fór heim með kött. Tilgangslausan kött sem trónir sperrtur með fuglum, múmínálfum, hjörtum og stúlkunni hennar mömmu

Þarf að fara aftur á muna-safnið á morgun. Vantar nefninlega bókina.

Ætla að skilja köttinn eftir heima.

Fjögur

2012-01-05T23:36:00.001Z

Áttadagur

2012-01-01T21:25:00.006Z

Gamla árið kvatt með Kötlugosi

Hlakka til þess nýja með þessa fallegu elsku

mér við hlið.

Gaml-árs gjöfli

2011-12-31T11:12:00.008Z

Ligg í rauðum rúmfötum með malandi kött, fallegan fýr, rjúkandi kaffi. Var að klára orðasinfóníu Vigdísar Gríms. Stuttklippt á síðasta degi ársins. Ári sem ég mun kveðja sátt í sinni. Tilhlökkun til þess næsta.

Áramót spila á skemmtilega strengi í brjósti og maga. Strengjasláttur um nýtt upphaf í bland við allt það gamla. 2011, 2012, þrettán eða fjórtán. Skiptir í sjálfu sér ekki máli. Ég vil bara áframhald.

Ástfangin, hamingjusöm, þakklát, glöð.

H.E.

2011-12-29T22:25:00.006Z

Spjölluðum og glöddumst með mömmu og pabba og systrum og bróður, mökum og börnum fyrr í kvöld. Eina sem vantaði var afmælisbarn dagsins.

Hér er amma á níutíu ára afmælisdeginum sínum fyrir ári síðan

með strákunum sínum.

Þessi, þar sem þau gera sig klár fyrir myndatökuna, fær að fylgja með

af því mér þykir hún skemmtileg.

Þetta er yndislegt líf

2011-12-28T23:19:00.007Z

Eftir dásemdir jólanna var vel við hæfi að borða tartalettur fylltar með hangikjöti, kartöflum, grænum baunum og uppstúf í kvöld. Toppaðar með osti og hitaðar í ofni af rétt rúmlega fimmtugum karlmanni sem aldrei áður hefur útbúið tartalettur.

Ætlaði að blogga um allar þessar dásemdir jólanna sem fyllt hafa líf mitt, en ligg þess í stað eins og lufsa á sófanum og hef ekki eyrun af Páli Óskari í sjónvarpinu. Hef dillað mér með flestum, ef ekki öllum stuðlögunum, og fallegu, rólegu lögin eiga greiða leið að ástföngnu hjarta mínu. Rétt eins og bros kærólufsunnar og mal kattarlufsunnar sem fylla sófann með mér.

Jahá, ég trúi svo sannarlega á ástina. Maður lufsast sko ekkert með hverjum sem er.

Aðfangadagur jóla

2011-12-24T16:32:00.000Z

1 dagur til jóla

2011-12-23T23:36:00.000Z

2 dagar til jóla

2011-12-22T23:38:00.001Z

3 dagar til jóla

2011-12-21T23:07:00.002Z

4 dagar til jóla

2011-12-20T23:05:00.000Z

5 dagar til jóla

2011-12-19T23:28:00.000Z

6 dagar til jóla

2011-12-18T20:14:00.003Z

7 dagar til jóla

2011-12-17T23:55:00.000Z

8 dagar til jóla

2011-12-16T23:01:00.001Z

9 dagar til jóla

2011-12-15T23:21:00.000Z

10 dagar til jóla

2011-12-14T23:45:00.000Z

11 dagar til jóla

2011-12-13T23:58:00.000Z

12 dagar til jóla

2011-12-12T23:09:00.001Z

13 dagar til jóla

2011-12-11T22:24:00.001Z

14 dagar til jóla

2011-12-10T21:17:00.000Z

15 dagar til jóla

2011-12-09T23:27:00.001Z

16 dagar til jóla

2011-12-08T23:17:00.000Z

17 dagar til jóla

2011-12-07T22:43:00.000Z

18 dagar til jóla

2011-12-06T22:50:00.001Z

19 dagar til jóla

2011-12-05T23:30:00.000Z

20 dagar til jóla

2011-12-04T22:33:00.001Z

21 dagur til jóla

2011-12-03T22:56:00.005Z

22 dagar til jóla

2011-12-02T23:02:00.002Z

23 dagar til jóla

2011-12-01T22:53:00.002Z

Ólafsvíkurvaka

2011-11-24T23:41:00.000Z

Fór til Ólafsvíkur um helgina og knúsaði nýju frænku mína sem er álíka létt og tvistpoki og sæt sem sykurpúði. Fór líka og skemmti mér dáyndisvel í Röstinni á Hellissandi, söng og tjúttaði með systrum mínum og dáðist að myndarlega manninum mínum á dansgólfinu.

Það er gott að eiga glás af góðum systrum

og ekki síðra að fara með sætasta stráknum af ballinu heim

Heim á næsta hótel þar sem ég svaf eins og grjót meðan rokið og rigningin hamaðist í dansi. Fékk mér svo svínahamborgarhrygg í morgunmat.

Og aftur líður að helgi. Merkilegt nokk. Næstum jafn merkilegt og að ég ætli til Ólafsvíkur aðra helgina í röð.

Fiskur á fisk ofan

2011-11-10T22:57:00.004Z

Sá myndarlegi sá um matseld kvöldsins enda myndarkokkur mikill. Hann hefur býsnarinnar ánægju af að elda "upp úr sér" og gerir það af mikilli lyst. Í kvöld eldaði hann samt eftir uppskrift. Hann er nefninlega líka ansi lunkinn í þeirri listinni

Sjáið þið ekki öll fiskinn sem gapir í fiskréttinum?

Bananaþrái.

2011-11-09T20:27:00.006Z

Ætlaði að baka kökuna sem ég bakaði ekki síðustu helgi í kvöld. Fann hvergi bananana sem ég er búin að nostra við í stífu þroskunarferli. Grunar að hreindýrinu okkar hafi fundist það þjóðþrifaverk að fleygja þeim. Allavega tveimur, ekki ólíklegt að sá þriðji hafi sjálfur skriðið í tunnuna enda elstur og orðinn mikið bóhem.

Ég neyddist því til að steikja bollur og sjóða spaghettí. Engin kaka í kvöldmat hér

Svona er að þrífa ekki sitt eigið heimili.

Mann-rétt-indi

2011-11-07T18:16:00.008Z

Ætlaði að baka köku um helgina. Las í staðinn 2 bækur og fór 2 í bíó.

Amnesty er með (Ó)sýnilega kvikmyndadaga þessa dagana. Eða réttara sagt þessi kvöldin. Kvikmyndir sem allir hafa gott af að sjá, þó ekki væri nema eina.

Sá myndarlegi stendur sína Amnestyvakt með sóma og er nokkuð lunkinn í að fá fólk til að taka þátt í herferð Amnesty. Herferð sem krefst þess eins að þú skrifir nafnið þitt. Ég verð alltaf jafn hissa þegar ég sé manneskjur staldra við, spjalla við þann myndarlega, kynna sér herferðina, en neita svo að skrifa nafnið sitt á eins og einn snepil. Snepil sem getur haft heilmikil og mikilvæg áhrif. Ef þú ert svo lánssöm/samur að eiga val á að hripa nafnið þitt niður, mannréttindum til handa, áður en þú svo lullar þér í sjoppuna að kaupa þér popp og kók, af hverju gerir þú það þá ekki? Mannréttindi eiga að vera sjálfsögð en ekki forréttindi.

Mannréttindi eru ekki bara fyrir okkur sem getum leyft okkur að baka köku um helgar, lesa bækur og fara í bíó. Mannréttindi eru fyrir ALLA.

Sjónvarp & kaka?

2011-10-29T18:50:00.006Z

Það rifjaðist upp fyrir mér þegar maður kom í Melabúðina í gær og spurði hvort þar fengist sjónvarpskaka, hvað það væri orðið hrikalega langt síðan ég hafði fengið sjónvarpsköku. Ég íhugaði að hringja í Hallveigu systur mína og biðja hana um að baka eina slíka, en fannst heldur langt að fara í kaffi alla leið til Ólafsvíkur. Ég fór því á netstúfana og fann þessa uppskrift. Ég átti nefninlega sjálf von á kaffigestum

Fyrsti sjónvarpskökubaksturinn myndast að minnsta kosti vel og ekki kvörtuðu Gulla og Brói, enda sómafólk mikið

Í dag keypti Gulla sér sinn árlega jólasvein sem bætist í myndarlegt safn af sveinkum. Þennan keypti hún handa mér

Ég ætla að láta Gullu litlu standa á kommóðunni í forstofunni svo hún geti tekið á móti gestum með mér, hún er svo skemmtileg og prakkaraleg á svipinn, soldið eins og Gulla stóra.

Við erum því væntanlega formlega byrjuð að skreyta fyrir jólin hérna í Túninu.

Mikið sem það er annars dáyndislegt að þekkja skemmtilegt fólk.

Gulrætur & ananas

2011-10-23T16:55:00.005Z

Þrátt fyrir að hafa á afar klaufalegan hátt tekist að þeyta öllum kurlaða ananasinum út í loftið er ég hristi safann frá í sigti, var gulrótarkaka dagsins stórfín. Já, það er ananas í þessari gulrótarköku

Blandið saman 5 dl af hveiti, 2 tsk af lyftidufti, 1,5 tsk af matarsóda, 1 tsk af salti, 2 tsk af kanil, 1 tsk af múskati og 5 dl af sykri. Rífið 5 dl af gulrótum og grófsaxið 2,5 dl af hnetum. Hrærið 4 egg og 2 dl af matarolíu saman og blandið við þurrefnin ásamt lítilli dós af kurluðum ananas (safinn ekki notaður), gulrótum og hnetum. Setjið deigið í smurt form og bakið neðarlega í ofni í u.þ.b. klstund.

Í kreminu er 150 gr af rjómaosti, 250 gr af flórsykri og sítrónusafi eftir smekk, hrært af myndugleik.

Úr Af bestu lyst 1 frá 1993.

Maður skyldi þó ekki eiga það eftir

2011-10-21T23:29:00.001Z

að taka upp prjónaskap og hefja spil á tölvuleikjum?

Guðmundur Matthíasson

2011-10-20T12:31:00.000Z

er vinsamlegast beðinn um að vitja póstsins síns í Samtúni 8

Var Nonni manni?

2011-10-19T22:49:00.005Z

"En ástæðan var þessi: Mamma hafði sagt, að ég væri allt of lítill til þess að geta veitt silung.

Þessi orð höfðu mér gramizt. Mér fannst hún gera allt of lítið úr mér. Ég var fullur af ákafa að geta sýnt mömmu, að ég væri strákur,en ekki stelpa, og gæti gert eitthvað, sem gagn væri að, þó að ég væri ekki eldri en þetta."

Á Skipalóni eftir Jón Sveinsson.

Stórundarlegasnarskrýtið

2011-10-18T21:28:00.006Z

Fannst skrýtið að standa í matvörubúð rétt um níu að kvöldi að kaupa mjólk. Fannst líka skrýtið að vera afgreidd á kassa af stútungskarlmanni. Næstum jafn skrýtið og hvað lagið sem ég heyrði á leiðinni heim frá þessum skrýtnu uppákomum þeytti huga mínum aftur til FB. FB sem ég hugsa næstum aldrei um og tilheyrir e-m tíma sem ég kannast næstum ekki lengur við.

Til að gera skrýtna atrennu stórskrýtnari sá ég Sigurbjörgu Kötlu á Facebook þegar ég var svo komin heim. Og það var ekki ég. Ég er bara Katla þar. Síðast þegar ég fletti Sigurbjörgu Kötlu upp hjá Hagstofunni fékk ég sem fyrr að vita að ég væri sú eina. Þó er þessi nýja fædd 1996. Stórundarlega snarskrýtið en skemmtilegt og ég þarf að lesa 199 bls. af Nonna og Manna áður en ég fer að sofa fyrir krossapróf á morgun. Þrátt fyrir að fjarlægjast ansi margt er greinilegt að sumt breytist seint. Eða jafnvel aldrei.

Mætti halda ég væri enn í Fjölbraut í Breiðholti. Ef ekki væri fyrir fjarlægðina.

Omnomm

2011-10-17T18:49:00.004Z

sagði lagrísinn.

Nammi-barir

2011-10-15T11:20:00.006Z

Íslenskt sykurfjall

Kryddfjall í Tyrklandi

Plokkfiskur með slátri

2011-10-14T21:15:00.002Z

Plokkfiskur gærdagsins rann ljúflega ofan í kallinn sem borðar ekki plokkfisk, og drengi tvo sem borða misvel og mikið, enda bragðbættur með hvítlauk, karrí, osti og sinnepi

Mér þykir hann þó langbestur eins og amma gerði, einfaldur hveitijafningur og slatti af lauk og pipar.

Vorum enn þjóðlegri í matseldinni í kvöld og skófluðum í okkur slátri. Melabúðin selur slátur með 40% afslætti þessa dagana, haustslátrun. Það þykir mér góður díll. Mun betri en díllinn um að hafa uppstúf og karteflur í stað rófustöppu. Hvílík endemis arkansansans vitleysa. Tók ekki einu sinni mynd af því.

Í morgunhúminu

2011-10-11T06:17:00.000Z

gat ég ekki varist þeirri tilfinningu að með mér væri fylgst. Hélt þó ótrauð áfram að sýsla við uppáhellinguna og tautaði við sjálfa mig að láta myrkan morguninn ekki hlaupa með mig í gönur.

Svo sá ég hann

Hann virtist skelkaðri en ég af þessu eina auga að dæma. Eða hvað...

Kallinn í borðinu hlýtur að hafa fylgst með lengi. Ætli hann hafi vitað það sem aðrir ekki áttuðu sig á? Ætli hann horfist alltaf í einu auga á það sem aðrir forðast að sjá? Þýðir þetta að lúna, ljóta borðið er allt í einu komið með karakter? Og hvað er eiginlega málið með það að allt geti e-n haft karakter, svo gott sem sama hvað það er? Er rosalegur karakter í manninum?

Og hvenær í ósköpunum ætli ég hætti að vakna á Tyrklandstíma?

S-ól-ars-æla

2011-10-10T23:00:00.000Z

Eftir 2 vikur í tómri sælu og Tyrklandssól var ekki mikið mál að mæta aftur til vinnu. Fékk þær dásamlegu fréttir í morgunsárið að ég hefði eignast splunkunýja frænku í gær og ég gleðst yfir því að kvennaveldið í fjölskyldunni er á geysigóðu róli. Skítt með það þó klukkan hjá okkur hafi verið þrjú um nótt er við komum heim í gær um íslenska miðnættið, vinnustundirnar átta á þessum sólríka en kalda mánudegi flugu hjá. Skríkti líka af gleði við að taka upp úr töskunum eftir vinnu.
Jæja, ég hálflýg því nú, ég skríkti aðallega af gleði þegar nýju skópörin sem sá myndarlegi keypti handa mér í útlandinu gægðust upp úr töskunni.

Er hreint hissa á að ég skuli ekki einfaldlega springa af hamingjunni sem gutlar og geysist inni í mér. Út af þeim myndarlega sko.
Sú ást hefur ekkert með skó að gera. Onei.

Sykrað & sætt. Dís-ætt.

2011-09-24T17:56:00.004Z

Tabaði mér á ahamerískum dögum í ónefndum stórmarkaði með Trixað hjarta í gærkveldi

Sykur fyrir tennurnar. Það myndi Winshaw fjölskyldan segja.

BLestur

2011-09-23T23:02:00.002Z

Milli þess sem ég kreisti krúttlega kallinn minn og krúttlega köttinn okkar, mæti í vinnuna og skólann, er ég húkt á siðblindri og fremur ógeðfelldri Winshaw fjölskyldu

Þar á undan var ég á kafi í ólánsemi og óhamingju Maxwells Sims.

Bráðum kemst ég í Rotters klúbbinn.

Mér finnst rigningin góð

2011-09-18T21:57:00.001Z

finnst mér skemmtilegt lag. Kannski af því mér finnst rigningin góð þó hún sé blaut. Þegar ég var unglingur fór ég stundum út mjög seint á kvöldin ef það var rigning, berfætt í uppáhaldsnáttfötunum mínum sem voru gömul herranáttföt. Labbaði hægt í Elliðaárdalnum og naut þess að fá rigninguna á mig í næturkyrrðinni og finna kalda, blauta steypuna undir fótum mér.Hugsanlegt að heill aldursmunur sé liðinn síðan ég gerði þetta síðast. Hugsanlegt að þetta sé ennþá skemmtilegt. Ég er bara yfirleitt sofnuð svona seint á kvöldin þó ég sé enn ung~~lingur~~.

Núna er líka rok.

Nýr diskur

2011-09-17T14:26:00.009Z

í nýja matarstellið

Sá myndarlegi var farinn aftur utan en er núna aftur kominn heim. Kom í gær með enn sænskari pakka en síðast

Verð alltaf jafn glöð að fá ástina mína heim. Óháð pakka. Aaalveg satt. Mér leiðist svo að sakna hans. Miklu skemmtilegra að hafa hann hjá mér. Hann býr líka til svo góðar, flöffí pönnukökur

Líklega þær bestu í heimi. Þannig er það.

Nenni ekki að finna nafn á þessa færslu

2011-09-11T22:22:00.002Z

Eftir síðbúna hádegisverðarveislu með góðum gestum og ofáti drifum við myndarlegi okkur í framkvæmd innanhúss. Framkvæmd sem lengi hefur staðið til, tók ekki sérlega mikið á né krafðist mikilla tilfæringa, en breytir alveg heljarinnar heilmiklu. Og núna er ég löt. Heljarinnar húðlöt. Svo löt að ef ég væri ekki nýbúin að fjárfesta í fartölvu þá væri ég ekki að blogga núna. Svo löt að ég nenni ekki að setja inn myndir af kræsingum dagsins, ostakökunni sem ég byrjaði á í gær eða einfalda, lata pulsuréttinum sem ég nennti svo ekki að elda og dæmdist á þann myndarlega fyrir vikið. Svo löt að ég er þegar komin í rúmið þar sem ég er sannfærð um að ég er of löt til að nenna að hátta mig síðar í kvöld. Svo löt að ég er að íhuga að lesa bara á bókina hjá þeim myndarlega því ég er ekki viss um að nenna að halda á bókinni sem ég er að lesa.

Svo löt að ég nenni ekki að hamra meira á lyklaborðið.

Makstur

2011-09-10T22:05:00.001Z

Sá myndarlegi tók sig til og skar niður baguettebrauð gærdagsins, vætti með ólífuolíu, raðaði gúmmelaði úr ísskápnum ofan á sneiðarnar og stakk inní ofn í dulitla stund. Nýtti þar með brauð, sem annars hefði endað sem rasp, í dásamlega kvöldmáltíð fyrir tvo

Sá myndarlegi er fantagóður kokkur og sérdeilis lunkinn í réttum sem hann sjálfur kýs að kalla því girnilega nafni; upp úr mér. Ég hins vegar hef meiri ánægju af að kokka eftir uppskrift. Eins og t.d. ostatertuna sem ég er að baka núna, hún er fengin úr Gestgjafanum, 8.tbl.2007. Ég vildi óska að ég hefði getað myndað fyrir ykkur dásamlegu lyktina af fínt möluðu Bastogne kexinu frá LU, blandað saman við sykurinn og smjörið, en því miður verður þessi lyktarlausa að duga

Mér stóð svo ekki á sama þegar aðalfyllingin fyllti upp í fatið. Hún lyktar reyndar líka voðalega vel en ég á eftir að bæta einu þynnra lagi við, og hún virðist ekkert vera að minnka í ofninum

Sjáum til, sjáum til.

Suma daga

2011-09-09T08:27:00.000Z

er ég með púka að störfum í höfðinu. Púka sem gaggar og galar og kroppar í hugsanir mínar. Það angrar mig þegar hann angrar mig og ég skil ekkert í mér að vera ekki dugmeiri en hann. Suma daga.
Ég sem er ástfangin og hamingjusöm hef ekkert með púka að gera. Ég sem er lánsamari en margir aðrir sem læra aldrei alveg að njóta ástarinnar og lífsins sem hún hefur upp á að bjóða. Lífið er nefninlega allt öðruvísi þegar maður er ástfangin. Betra. Skemmtilegra. Fallegra. Innihaldsríkara. Skyggir á púka. Púki, farðu og bíttu í brosandi kex

Ostasallat Stefaníu

2011-09-06T22:29:00.004Z

var fantagott á flottu brauði frá Sandholti

Ananaskurl, sýrður rjómi, majónes, hvítlauksostur, mexíkóostur, paprika, blaðlaukur.

Gestgjafinn, 1.tbl.2006.

Lata pulsa

2011-09-05T21:09:00.005Z

Þessi einfaldi letiréttur fyrir tvær latar lúður kom verulega á óvart

Kartöflur skornar niður og soðnar í saltvatni í um 10 mínútur.

Þunnt skorinn laukur steiktur í smjöri stutta stund, rétt til að mýkja og glæra.

3/4 dl af hvítvínsediki hellt út á laukinn ásamt 1 dl af vatni og látið sjóða stutta stund.

1 tsk af sykri sett saman við ásamt kartöflunum.

Saltað og piprað og steikt í gegn, þó án þess að brúna laukinn mikið.

Pylsur steiktar skv leiðbeiningum á pakka.

Hefur annars e-r lesið leiðbeiningar á pylsupakka? Ekki ég.

Gestgjafinn - 8.tbl.2007

Myndar-stell

2011-09-04T10:06:00.007Z

Sá myndarlegi kom loksins heim í gær

velktur og þreyttur en brosandi fínn með skemmtilega skrýtinn pakka

Matarstellshugmynd hefur formlega verið hrint í framkvæmd

Ég er yfir mig hyfir mig lifandis ánægð.

Þessi myndarlegi snáði

2011-09-01T22:48:00.005Z

fæddist á Óðinsgötu fyrir 64 árum. Hann var í góðu yfirlæti er ég heyrði í honum fyrr í kvöld; kominn til systur minnar á Hellu úr hringferð um landið, búinn að fá pakka, góðan mat og var að fara að gæða sér á ekta rjómatertu sem mamma gerir bestar. Áreiðanlega búinn að fá knús frá litlum, sætum systrum. Pabba leiðist sko hvorki að fá faðmlag né að gefa faðmlag. Pabbi er líka með hlýjan og góðan faðm. Faðm sem hefur óspart knúsað 5 börn, 8 afabörn, 4 langafabörn og er enn að. Sem betur fer. Hlý og góð faðmlög eru gulls ígildi.

Ýtti á e-n takka á sjónvarpsfjarstýringunni.

2011-08-31T15:40:00.000Z

"Augnablik, hleð inn sjónvarpsviðmóti" birtist á túbuskjánum. Sá myndarlegi er erlendis svo ég neyddist til að finna út úr þessu sjálf. Slökti því á sjónvarpinu. Fór að hugsa um viðmót. Hjá fólki. Komst að eftirfarandi;

Mér leiðist óskaplega biturt fólk.

Mér leiðist líka stjórnsamt fólk, fólk sem kann ekki að sleppa takinu og njóta nútíðarinnar, fólk með frústrasjónir og endalausa komplexa út í annað fólk.

Að auki leiðist mér líka dónaskapur, sér í lagi af fullorðnu fólki sem ætti að kunna að skammast sín og sýna lágmarks kurteisi öðrum til handa.

Mér leiðist fólk sem fettir fingur út í hamingju annara, fólk sem kann ekki að samgleðjast öðrum.

Og eins og þetta sé ekki nóg, þá leiðist mér mest af öllu fólk sem fettir fingur út í e-ð sem það gerir svo sjálft, og þá er það í lagi og jafnvel kjút, skondið og skemmtilegt.

Mér leiðist nebbla líka hræsni.

Fimm-vörðu-Þórs-mörk

2011-08-28T20:38:00.005Z

Um helgina labbaði ég Fimmvörðuháls með þeim myndarlega

gisti í Þórsmörk

og las landslag er aldrei asnalegt

"svona varð það til

landslagið

sumum finnst það fallegt

landslag er aldrei

asnalegt"

"Tekið upp af bls. 169 í landslag er aldrei asnalegt eftir Bergsvein Birgisson"

Loft-hæna

2011-08-27T06:45:00.003Z

Eftir 2ja daga umhugsun fór ég og keypti hana þessa. Fannst kominn tími til að eyða peningum í svona tækni, enda komin vel inn í þrítugsaldurinn. Hún er þó ekki ástæðan fyrir því að ég er komin á fætur eldsnemma á laugardagsmorgni. Við myndarlegi erum að fara í ferð. Gönguferð. Áhyggjulaus. Fyrir þá sem hafa áhyggjur, sér í lagi nafnlausa liðið, þá er ekkert að óttast. Nýja tölvan mín verður vandlega falin undir lausa þilinu í gólfinu vinstra megin undir rúminu okkar í hjónaherberginu í risinu. Og hana nú.

Já, það er kominn föstudagur.

2011-08-26T06:49:00.005Z

Aftur. Hvernig sem á því stendur. Er nýbúin að furða mig á því á Facebook að það hafi verið mið-vika s.l. miðvikudag. Aftur. Fékk eina undirtekt hjá vinum. Greinilega enginn að furða sig á ógnarhraða tímans. Líklegast flestir búnir að sættast við þann hraða. Ég er reyndar ekkert ósátt. Get ekkert kvartað yfir því að vikurnar fljúgi í bráðskemmtilegri vinnu og að helgarnar hverfi í vellíðan. En ég væri alveg til í að hætta að vakna reglulega á undan vekjaraklukkunni. Finnst hálfpínlegt að skríða fram úr um sex og skilja fimmtuga hróið mitt eftir í rúminu, sofandi vært eins og unglingur. Á þessu virkilega ekki að vera öfugt farið? Eða er það bara enn ein klisjan?

Ekki skil ég hvað það er sem vekur hugann svona snemma. Kannski er tilhlökkunin að komast í vinnuna svona ferleg. Eða kaffiþörfin svona bagaleg. Það eru altjént ekki áhyggjur sem stela frá mér svefni og það hlýtur að vera gott.

Það er auðvitað alveg yndislegt að virða þennan fallega, stilla morgun fyrir sér. Horfa út lygnann flóann út um baðherbergisgluggann, hlusta á þögnina, hugsa um fallega manninn minn sem sefur og já, einmitt! Reyni að muna þennan þegar ég byrja að geispa seinnipartinn og á enn eftir að vinna nokkra kltíma.

120 ár

2011-08-22T20:11:00.007Z

Bróðir minn er orðinn þrjá-tíu-og-fimm-ára. Sama hvað hann rembist við að eldast þessi elska, þá verður hann alltaf litli bróðir

Brósi í óvæntu afmælisveislunni sinni s.l. laugardagskvöld

Sá myndarlegi uppástendur að daginn sem bróðir minn fæddist hafi hann verið að skenkja vín á heimili foreldra sinna á Hvolsvelli. Það vill nefninlega svo skemmtilega til að minn ágæti tengdafaðir deilir afmælisdegi með bróður mínum

Matthías og Dagur í afmælisveislunni minni á afmælisdegi
Hjalta í febrúar s.l.

Þrátt fyrir að hálf öld skilji þessa kauða að í aldri finnst mér margt líkt með þeim. Báðir eru þeir hávaxnir og grannir. Báðir eru þeir rólegir og yfirvegaðir. Báðir eru þeir víðlesnir og vita heljarins öll um allt og ekki neitt. Báðir segja þeir skemmtilega frá. Báðir eru þeir ljúfir og hafa góða nærveru. Báðir eiga þeir afmæli í dag.

Fínir náungar.

Lífið á rósum

2011-08-18T12:30:00.007Z

Þrátt fyrir áhyggjur andlitsbókarvina og nafnlausum aðila (lesist: heigull sem þorir ekki að skrifa undir nafni) var ekki brotist inn meðan við myndarlegi nutum Hornstranda. Húsið heldur aldrei tómt.

Fullt af ýmsum skrýmsum hlutum hafa skekkt tímann og skynið síðan þá. Höfum skipts á gleði, hlátri, skoðunum, áhyggjum, styrk, sorg og tárum. Höfum haft hausana fulla af hugmyndum, spennu, væntingum og vonum. Ekki víst að rætist úr öllu. Og þó.

Tíminn stendur víst aldrei kyrr. Lífið er upp og niður, út og suður og jafnvel fer í hringi. Lífið er ekki einfalt og ekkert okkar kemst lifandi frá því. En lífið er gjöf og það er þess virði að lifa því.

Eins og ástin mín segir stundum: lífið er ekki bara leikur, það er líka dans á rósum

Amma Hallveig

2011-08-09T21:43:00.001Z

Amma mín,

takk fyrir allt og allt.

Sjáumst síðar.

Þín, Katla.

Hýr

2011-08-07T10:45:00.005Z

Á hinsegin degi gærdagsins fór ég með köttinn til dýralæknis, keypti almennilegt kaffi, labbaði niður í bæ, naut veðurblíðunnar, rakst á vini, fékk gluggasæti á krúttlegum veitingastað, fann systur mína á Arnarhóli, fór í mat til mömmu, mátaði hatta og sá Pál Óskar í fréttunum.

Páll Óskar hefur lengi verið í uppáhaldi hjá mér. Eftir því sem árin líða festir hann sig meir og meir í þeim sessi. Páll Óskar er ekki bara frábær listamaður, hann er frábær mannvera. Ég dáist að honum ekki bara fyrir að vera flottastur í göngunni ár eftir ár, heldur fyrir boðskapinn. Orðum Palla þarf að halda á lofti alltaf, alla daga, jafnt og þétt.

Hjá mér eru hinsegin dagar alla daga.

Mæli með því að þú klikkir á Orðum Palla, það er þess virði að hlusta á þau. Oft.

Kistu-lagning

2011-08-04T23:21:00.003Z

Í kistulagningu ömmu í dag varð mér hugsað til þess að áður fyrr voru lík oft mynduð. Ég man vel eftir myndinni af bróður hennar mömmu, sem dó 10 daga gamall, í opinni kistunni fyrir ofan rúmgaflinn hjá ömmu og afa. Ég horfði oft á hana og þótti hún falleg. Í dag langaði mig að taka mynd af ömmu, hún var svo falleg og friðsæl, næstum eins og hún svæfi værum svefni á hvítum koddanum. Ég var bara ekki með aðra myndavél en augun og hugann.

Pabbi man eftir því að afi hans var um vikubil hafður í opinni kistu í borðstofunni heima áður en hann var jarðaður. Sömu sögu var að segja um ömmu hans í sveitinni, hún var í kistunni inni í stofu í vikutíma fyrir jarðarför. Í dag er nándin við dauðann ekki svo mikil. Við virðumst fjarlægast hann meir og meir. Við fengum góðan tíma með ömmu á spítalanum eftir að hún var látin. Þó hún hefði kvatt og væri farin, þá finnst mér þessi stund á eftir dýrmæt. Og þó að kveðjan í dag væri erfið þá fannst mér gott að sjá hana aftur, strjúka kalda kinnina hennar og mjúka, þykka hárið.

Dauðinn er óþægilega endanlegur en hann er líka eina vissan í okkar heimi.

Amma mín,

2011-07-31T22:18:00.003Z

sem skírð var Hallveig í höfuðið á landnámskonu okkar Íslendinga, er dáin. Amma var hress alveg fram að síðasta miðvikudegi, er hún veiktist og var flutt á Landspítalann. Í gærkveldi kvaddi hún okkur.

Amma var búin að fylgja mörgum ástvinum sínum til grafar og ég veit að hún var sátt við að deyja. Ég er þakklát fyrir að amma fékk að fara fljótt og við fengum tíma til að kveðja.

En ég er líka sorgmædd. Það er erfitt að kveðja góða ömmu þó hún hafi verið níutíu ára gömul og södd lífdaga.

Erum farin í ferðalag

2011-07-03T12:32:00.002Z

Vetur safnar liði

2011-06-28T23:11:00.003Z

Ákvað að bíða ekki heldur bjóða þrátt fyrir að sá myndarlegi væri ekki erlendis. Hann sat við hliðina á mér meðan ég bauð í hans nafni. Jesúsaði sig og hótaði að tala við Símann og láta loka fyrir aðgang að uppboðssíðunni. En ég sá glampann í augunum á honum. Uppboðsglampann. Má vera að hann sé ekki alveg jafn kræfur, en ég hef enn aðgang að síðunni.

Sá myndarlegi segir að ég fái allt sem ég vil. En það er ekki þannig sem það var. Í þetta sinn fór ég og skoðaði verkið áður en ég hófst handa við að bjóða. Um leið og ég sá það ákvað ég að ég ætlaði að kaupa hana. Og það er þannig sem það er. Ég stend við ákvarðanir mínar.

Ég var líka búin að ákveða staðinn fyrir hana

Svo nú þegar sá myndarlegi hefur loks losað sig við fingurbjargarsafnið er ég farin að safna. Veturliða. Safnið mitt tekur meira pláss en það er líka meira fyrir augað. Og það er fljótlegra að dusta rykið af safninu mínu.

Ég á ekki einu sinni afmæli

2011-06-25T14:34:00.007Z

Bara besta mann í öllum heilum heiminum.

Með ábót og ábót ofan

Og það er ekkert bara bara.

Hörður

2011-06-23T22:36:00.003Z

Fyrir ríflega tveimur áratugum hringdi drengstauli dyrabjöllunni á æskuheimili mínu og spurði eftir Möggu systur minni. Ég skildi hann eftir úti á stéttinni og gólaði á systur mína að það væri feitur, sköllóttur kall að spyrja eftir henni.

Síðan þá höfum við ekki losnað við hann. Tengdasynirnir hafa komið og farið. Jafnvel komið aftur og farið aftur. Tengdasonur nr. 1 á nafnbótina skilið fyrir að standa keikur og láta engan bilbug á sér finna. Honum hefur þó hvorki tekist að verða sköllóttum né feitum, en í dag tókst honum að verða fertugur.

Og áfram lætur hann engan bilbug á sér finna; vippar sér í stúdentspróf og háskólanám langt genginn á fertugsaldur, hefur óbifandi metnað í Risk og heldur áfram að leika sér að bílum

Flat-ey

2011-06-22T22:33:00.014Z

Fór með þann myndarlega í óvissuferð til Flatey til að fagna því að hann væri kominn á sextugsaldurinn. Hokinn af hugsanlegri 9 tíma bið í Flatey, roki og trúleysi studdi sá gamli sig við skriftir í kirkju staðarins

Eftir dágóðann hádegisverð og innskráningu á fallegt og hlýlegt hótel eyjunnar var fimmtugi unglingurinn sprækur sem lækur

og kampakátur sem kóngur í hásæti

enda missir maður ekkert húmorinn við það að rétt silast yfir hálfa öld

og ekki á hverjum afmælisdegi sem maður fær súkkulaðitertusneið með kakófugli

Flatey er líka flott og fín

og rokið skiptir engu máli þegar ástin heldur manni hlýju

Spott á sportprís

2011-06-16T23:19:00.001Z

Sá myndarlegi gerir grín að mér fyrir að segja (og skrifa) sportprís. Skv. honum á þetta að vera spottprís. Heyr nú á endemi, ég hef aldrei heyrt annað eins. Sá myndarlegi segir líka "er ekki kominn tetími" í staðinn fyrir kaffitími. Uppástóð að þannig væri það þó enginn sem ég kannast við þekki annað fyrirbæri en kaffitíma. Já, líka amma mín níræð. Enda drekkur sá myndarlegi aldrei te. Svo kallar hann líka safa djús og djús safa. Hnuss. Oseiseinei, ég fer nú ekki að taka mikið mark á þessu þvaðri. Enda vitum við öll að; á baki hvers manns liggur góð kona. Allavega ég. Og Magga systir mín.

Talandi um 17.júní, þá er hann á morgun. Í fyrsta skipti í milljón, billjón ár ætla ég hvorki niður í miðbæ Reykjavíkur né á Rútstún. Ekkert þjóðhátíðarpopp þetta árið, seiseinei. Við höfum öðrum skemmtilegri hnöppum að hneppa.

Jibbíjeyoghæhó.

Mál-verk

2011-06-15T22:42:00.003Z

Málverkin okkar sóma sér bara vel uppi á vegg. Mikill léttir. Mér láðist nefninlega að nefna það í færslunni á undan að við vorum bara búin að skoða málverkin á veraldarvefnum. Fórum sko ekkert í galleríið til að bera þau berum augum. Ég var því ósköp fegin að fá góðu tilfinninguna fyrir myndunum þegar ég sótti þær daginn eftir; þessa þarna góðu sem fær mann til að laðast að listaverki. Og sú þriðja og kostnaðarsamasta og sem ég hafði mestu spennuna fyrir og sá myndarlegi reitti fagurt hár sitt fyrir á hótelherbergi í útlöndum, er æði. Sjónrænn segull. Príma falleg og fríð.

Hjúkket.

Talandi um mat, þá bakaði ég hana þessa fyrr í kvöld

Baka með kúrbít og geitaosti með ösku. Þeytt egg, mjólk, salt, pipar og timían eins og hleyptir lúxus ábrestir á milli. Hún er líka æði. Sjónrænn segull (sjáið bara sprungurnar íostinum og hrukkurnar í kúrbítnum, mana ykkur í að smella á myndina til að stækka). Príma falleg og sérdeilis góð.

Hjúkket.

Lyst á list.

2011-06-14T22:56:00.007Z

Fyrir rúmri viku síðan sat ég stjörf yfir uppboði á netinu. Listmunauppboði. Við Pétur höfum oft talað um það að prófa að bjóða í verk, kannski bara smotterísboð svona rétt til að sjá hvað myndi gerast. Höfum nefninlega oft séð flottar myndir slegnar á sportprís. Sá myndarlegi var erlendis á tilsettum lokadegi uppboðs svo ég sat hér ein við tölvuna og byrjaði að bjóða. Fyrstu tvær fékk ég nokkuð auðveldlega á fínum prís. Þegar kom að þeirri þriðju, og jafnframt þeirri mynd sem ég ágirntist mest, fór e-r rækallans kalli að bjóða á móti mér. Ég reyndi að leiða hjá mér þá tilhugsun að hugsanlega væri galleríið að bjóða á móti mér; þetta hlyti að vera búttaður miðaldra maður, með svargrátt hár skipt í miðju, með yfirvaraskegg, í beigelituðu prjónavesti með doppótta þverslaufu um hálsinn.

Og ég bauð. Og bauð. Og beið. Og beið. Því í hverst sinn sem ég bauð lengdist tíminn um 4 mín. svo hægt væri að bjóða á móti. Og ekki bara bauð ég og bauð, heldur bauð ég í Péturs nafni, sem sat og beið á hótelherbergi í Kaupmannahöfn og jésúsaði sig og ákallaði heilagan viskífleyg yfir hverjum tölvupóstinum sem birtist í ipadnum um boð og mótboð. Sms-in sem ég fékk frá honum fóru frá því að vera "glaður og spenntur yfir að hafa eignast tvö málverk með þér", yfir í að "ég get ekki skilið þig eina eftir heima kona".

Ég var í ham. Uppboðsham. Var farin að velta því fyrir mér hvort það væri svona sem spilafíklum liði. Bara leggja aðeins meira undir...

Mér til þæginda hætti kallinn með þverslaufuna að bjóða akkúrat þegar ég gaukaði fram upphæðinni sem ég var búin að ákveða áður en uppboð hófst, að yrði mitt hámark. Ég mun því ekki komast að því að þessu sinni hvort ég er raunverulegur uppboðsfíkill.

Og nú er aftur uppboð á vefnum. Og við erum aftur búin að skoða allar myndirnar. En ég mun ekkert bjóða í þetta sinn. Pétur er heima og ekkert á leiðinni erlendis næstu vikurnar.

Reyndar ein mynd sem ég er rosalega hrifin af. En ég býð ekkert. Bíð bara.

Held ég.

Kókóskakan

2011-06-13T21:47:00.006Z

með hindberjamaukinu endaði með rifsberjasultu, árgangi 2009

Gestirnir sendir með sultu heim enda nóg af tauinu í kjallaranum. Jafnvel tau frá tíma sem enginn nennir að muna. Er það ekki annars ómunatíð?

Ónefndi pésinn heldur áfram að sulla

Á morgun er aftur kominn tími til að mæta í vinnuna.

Í heila þrjá daga í röð.

Lífið er ljúft.

Annasamur dagur

2011-06-12T22:39:00.004Z

þessi hvítasunnudagur

Erum búin að vera kafupptekin af hvort öðru við kaffidrykkju, skipulagningar innanhúss sem utan, lestur, búðarferðir, leikhús, matseld og afmælisboð svo e-ð sé nefnt. Eins gott að helgin er löng, ég á enn eftir að baka kókósköku með hindberjamauki og fá yndislegar vinkonur í kaffi. Í ofanálag á ég líka eftir að hlægja svo miklu meira að e-m sem tókst að hella dollu af málningu á veröndina

Nefni engin nöfn...

Þriggja

2011-06-06T17:10:00.000Z

Sá myndarlegi er farin erlendis. Aftur.

Ég er farin að hitta afmælisstelpu

BÁ

2011-06-05T23:19:00.004Z

Fórum í dag í Gerðarsafn og stóðum andaktug yfir hverju einu og einasta verki Barböru Árnason sem þar eru til sýnis í aldarminningu hennar

Þið ykkar sem ekki hafa lagt leið ykkar í Kópavoginn að hitta köttinn Randver, Narfakotssystkinin, strákana í Melaskólanum og skoða borgarljósin skuluð drífa ykkur. Strax.

Sýningunni hefur verið framlengt til 15.júní og hún er stórkostleg.

Mál-tíð

2011-05-29T11:34:00.001Z

Í gær borðuðum við kvöldmat í Þjóðmenningarhúsinu. Í morgun borðuðum við morgunmat á veröndinni

Hvílík dásemd að þurfa ekki lengur að vinna um helgar. Hvílík dásemd að eiga tvo daga í röð til eigin ráðstafana óháð vinnu, eftir hverja 5 vinnudaga samfleytt. Hvílík dásemd að geta legið í bælinu, lesið, drukkið morgunkaffið í rólegheitum og gefið sér góðan tíma í koddahjal með ástinni. Hvílík dásemd að eiga bleika náttsloppinn hennar mömmu sem einnig má nota sem morgunslopp. Hvílík enn meiri dásemd að hlakka til að mæta í vinnuna á morgun.

Gæti hreinlega fallið í yfirlið

2011-05-20T22:14:00.003Z

er ég bít í danska snúðinn sem fæst í Sandholt, hann er svo dásamlega góður.

Croissantin þar eru líka dásamleg, svona eins og croissantin í útlöndum sem ég elska að úða í mig í morgunmat.

Í gær sagði ég upp í vinnunni minni. Í morgun fékk ég sms um að ég þyrfti ekki að mæta þar meir. Á mánudag byrja ég í nýrri vinnu.

Þar hafið þið það.

Þessi færsla er ekki styrkt af bakaríinu Sandholt

Af ástföngnum göngugarpi

2011-05-09T22:25:00.009Z

Fór í gær og fékk mér alvöru fjalladrullu á nýju gönguskónna mína

Hitti fallegan hund sem hlunkaðist með forsetann og Dorrit í eftirdragi. Hitti vinnufélaga sem hljóp upp og niður fjallið. Brann á hálsinum. Tók með mér aðra Esjujómfrú sem deildi sömu einörðu markmiðum og ég; að komast upp á topp og klára allt nestið áður en við kæmum aftur niður

Í gær kom svo fimmtugi unglingurinn minn heim úr strákaferðinni sinni af erlendri grundu. Gjafagóssið er gott og flott og fínt

Það jafnast þó ekkert á við að fá ástina aftur heim í fangið.

Það er besta gjöfin.